Bōiketo malebana le Selakhapane se Seholo sa ‘Muso bo butsoe ka Labobeli ke Lefapha la Phetisetso ea Likhoebo tsa ‘Muso Sechabeng. Bōiketo bo amohetsoeng ke bo tsoang sehlopheng se le seng sa Basotho se bitsoang ka hore ke Maluti Cut-Rite Butchery Bōiketo ba latela ho chechisoa ha letsatsi la nehelano ea likōpo ho tloha ho la 2 Phupu ho isa ho la 9 Phupu monngoaha ho latela likōpo tse entseong ke baiketi. 

‘Muso o fetoletse Moralo oa phetisetso ea Selakhapane matsohong a ikemetseng ho khiriso ea nako e telele. Morero o khothaletsa bōiketo bo tsoang ho bo-rakhoebo lihlpopha tsa Basotho ho latela Moralo oa Phetisetso o ileng oa etsoa pejana.  Moralo o reretsoe hore moiketi ea bontšang bokhoni ho latela lipehelo, a tle a nke bongata bo kaholimo ba liabo ha tse setseng li tla abeloa baiketi ba bang. 

Moralo o tla ntšetsoa pele ka hore khoebo e ngolisoe ka molao ele ea ‘Muso, ‘me baiketi ba bontšitseng thahasello, batla rekisetsoa liabo ho latela matla a bona a bōiketo. 

Liphatlalatso malebana le phetisetso ea Selakhapane li phatlalalitsoe maselinyaneng le li-ea-le-moeeng mahareng a khoeli ea Motšeanong monongoaha, moo ho amohetsoeng bōiketo ho tsoa lihlopheng tse leshome (10) letsatsing la la 28 Motšeanong 2004.  Ka morao ho moo, baiketi a kopuoe hore ho nehelana ka likōpo tse bontšang boiphihlelo ba bona malebana le tsamaiso ea Selakhapane esitana le Setsi sa Nontšo ea Liphoofolo. 

Ka letsatsi la nehelano ea likōpo, ho amohetsoe bōiketo bo tsoang sehlopheng sa Maluti Cut-Rite Butchery. 

 Lekala la Temo le Kanetso ea Lijo le ne le emetsoe pulong ea bōiketo. 

Phetisetso ea Selakhapane se Seholo sa ‘Muso matsohong a ikemetseng e laoloa ke Molao oa Phetisetso ea Likhoebo tsa ‘Muso Sechabeng oa Selemo sa 1995.