BAHESO,

KEA LE LUMELISA LE HO LE AMOHELA ’MOKENG ONA OA BAPHATLALATSI BA LITABA.  KE THABILE HAHOLO HA LE AMOHETSE MEMO EA KA ’ME LE TLILE KA BONGATA BONA.  HONA HO BONTŠA BOITELO LE BOHLOKOA BOO LE BO BEHANG MOSEBETSING ONA OA LONA.  KE MOSEBETSI OA BOHLOKOA RURI HOBANE O BEHA SECHABA LESELING KA TSE NTSENG LI ETSAHALA KAHARE ESITA LE KANTLE HO NAHA EA SONA, ’ME TSE LING TSA TSONA E LE TSE SE AMANG KA KOTLOLOHO.  HA HO LE JOALO, KE MOSEBETSI O LOKELANG HO ETSOA KA HLOKO LE KA ’NETE EOHLE E LE HORE SECHABA SE FUOE LITABA JOALOKAHA LI LE JOALO, SE SE THETSOE, SE SE FUOE LETSOHO KANTLE, SE SE FUOE LITABA HO LATELA MAIKUTLO LE BOTOLOKI BA BAPHATLALATSI; SE FUOE TABA ’ME SONA SE IKETSETSE LIQETO.

  BAHESO,

  SEPHEO SA ’MOKA ONA SE NTLHA LI PELI.  EA PELE KE HORE LEIPHUMANELE HO ’NA KA KOTLOLOHO LITABA TSENA TSEO KE TLANG HO LE MANOLLELA TSONA.  HA KE RATE HA LE NTSE LE LI UTLOA KA BO-BA-RE HOBANE BA TLA LI EKETSA, BA LI FOKOTSE, BA BE BA LI HLAPOLLE KA HO LI FA MEELELO EA BONA.   NTLHA EA BOBELI KE HORE LE BE LITSEBE LE  MELOMO EA SECHABA.  KA HONA, HA LE UTLOILE LITABA TSENA ’ME LE LI UTLOISISITSE KA HO MPHATA LIPOTSO KA HOHLE KAMOO LE KA KHONANG, TEBELLO EA KA KE HORE LE TLA LI FETISETSA HO SECHABA KA ’NETE EOHLE KAMOO LE LI FUMANENG HO ’NA.

  BO-NTATE LE BO-M ME,

  JOALOKAHA KE ILE KA BOLELA HA KE NE KE BULA  SEBOKA SE SEHOLO SA SELEMO SA LEKHOTLA LA PUSO EA SECHABA KA SECHABA KA LA 24 PHEREKHONG MONONGOAHA, KE FUMANE TOKOMANE EA BNP E BUANG KA ’MUSO OA KOPANELO.  HA KE LOKOLISA LITABA HANTLE, KE FUMANE LENGOLO  LE  TSOANG  HO  MONGHALI  JOSEPH  KAIBE  MOLLO,  E  LENG  MOLULA-SETULO  OA  HO BITSOANG  “ELECTION RESOLUTION COMMITTEE”.  KA LENGOLO LENA O NE  A NTSEBISA HORE O LAETSOE KE MOETAPELE OA BNP, MONGHALI JUSTIN METSING LEKHANYA, HO FETISETSA HO ’NA TOKOMANE EA ’MUSO OA KOPANELO “MEMORANDUM OF SETTLEMENT AGREEMENT”, A BILE A KOPA HO KOPANA LE  ’NA KAPELE HAMMOHO LE KOMITI EO EA HABO.  LENGOLO LA MONGHALI MOLLO LE NE LE SUPA HAPE HORE O SE A BUISANE  LE  E  MENG  EA  METSOALLE  EA  BONA  EA  SOUTH AFRICA KA TABA ENA, ESITA LE MEKHA E MENG EA LIPOLOTIKI LE HONA HO FANA KA TOKOMANE ENA HO MAFAPHA ANA.  MONGHALI MOLLO A TSOELAPELE HO SUPA HORE TOKOMANE ENA E RERETSOE HO TLISA KHOTSO EA ’NETE NAHENG EA RONA EA  LESOTHO.

KA THOKO HO TOKOMANE ENA EA ’MUSO OA KOPANELO, LENGOLO LA MONGHALI MOLLO LE QHOAELETSE LENGOLO LE TEKENETSOENG KE MONGHALI METSING LEKHANYA, E LE MOETAPELE OA BNP, LE MONGHALI BERENG SEKHONYANA, E LE MOTLATSI OA MOETAPELE.  LENGOLO LENA LA BOETAPELE BA BNP LE QHOAELETSE LIQETO TSA BOHLOKOA TSA PHUTHEHO EA BNP EA LA 16 PHUPU 2002, TSEO BNP E NENG E ANANELA HO THEHOA HA “ELECTION RESOLUTION COMMITTEE” E BOPILOENG KA  LITHO TSE ’NE, ’ME  EO MONGHALI MOLLO E LENG MOLULA-SETULO OA EONA.  LIQETO LI NE LI BILE LI FA KOMITI EO MATLA A HO KENA LIPUISANONG TSA HORE HO THEHOE ’MUSO OA KOPANELO.

LINTLHA-KHOLO TSA TOKOMANE EO EA ’MUSO OA KOPANELO “MEMORANDUM OF SETTLEMENT AGREEMENT” KE TSENA:

       1.TUMELLANO E PAKENG TSA;

•     MUSO  OA  LESOTHO

•     MOKHA  OA  BNP

•     IEC

•     LEKHOTLA LA PUSO EA SECHABA KA SECHABA (LCD)

•    MONGHALI  METSING  LEKHANYA

2.  BNP E TLA AMOHELA SEPHETHO SA LIKHETHO TSA MOTŠEANONG 2002 TLAS’A LIPALLO TSE ITSENG;

§                     3. BNP E TLA HULA LINYEOE TSA EONA TSE KA KHOTLA HAEBA IEC E                  TLA ETSA TLATSETSO EA M550,000 HO BNP BAKENG SA

                      LITŠENYEHELO TSA NYEOE;  

                       4. TONAKHOLO A ITLAME HORE O TLA ELETSA MOTLOTLEHI HO                  THONYA MATONA A MABELI LE MOTLATSI OA LETONA MOKHENG                    OA  BNP HO BA LITHO TSA KHABINETE; ’ME E BE MATONA A TOKA,                   LIHLOLILOENG, LE MOTLATSI OA LETONA LA LICHELETE;       

                       5. HO TSOSOLOSOE IPA HO LOKISETSA LIKHETHO TSE AKARETSANG                  TSE TLA TŠOAROA NAKONG EA LILEMO TSE  ’NE HO TLOHA HA HO                   SAENETSOE TUMELLANO;

                       6.  IEC E TENG E QHALOE HO THEHOE E NCHA KA LIKHOTHALETSO                  TSA IPA;

                        7.HO HLOMATHISOE MOLAO OA MOTHEO E LE HORE LENANE LA                   LITHO TSE THONYETSOANG HO KENA KA PARAMENTENG                   

                         KA SEMOTINYANE E BE 50, ’ME LE TSA MABATOOA E BE 50

         8.MUSO O ITLAME HO SIRELETSA BOLOKOLOHI BA MAKHOTLA HO BONA   HORE A SEBETSA KA TOKA LE KA TSELA E NANG LE    PONALETSO ’ME HO PHETHAHATSOE LITUMELLANO TSE FAPANENG TSA MACHABA.

        9.HA HO NTSE HO ETSOA TLHOPHO-BOCHA EA LITABA TSA MAKHOTLA A MOLAO ’MUSO O ITLAME HORE LINYEOE TSOHLE TSA BNP TSE NTSENG LI EMETSE HO SEBETSOA KE LEKHOTLA LE PHAHAMENG, LI LEBISOE HO MAKHOTLA A IKEMETSENG A KHETHEHILENG HO LI SEBETSA.

  10. LITSEKO TSA HO  RAFSHOA HA LITAEMANE TSE PAKENG TSA LIKHAMPHANI TSE FAPANENG TSA MONGHALI VAN ZYL LE ’MUSO LE MAKALA A ’ONA LI FETISETSOE HO LEKHOTLA LE IKEMETSENG LA MACHABA “AN INDEPENDENT INTERNATIONAL TRIBUNAL”.

 KAMORA’ HORE KE BALE LENGOLO LENA LA MONGHALI MOLLO LE TSOHLE TSE QHOAELLETSOENG HO LONA,  KE ILE KA HLOLLOA LE HO TSIETSOA KE  KAMOO BNP E INAHANANG KATENG. KE ILE KA BUISANA LE BA LEKHOTLA  LA HESO SEBOKENG  SE TSOA FETA SA SELEMO HORE LE BONA BA KE BA ’MAKALISE LE HO  MPHA  MATLA  A  HO  ARABA  KOPO  ENA  EA  BNP.

  KA BOKHUTŠOANYANE KARABO E SUPA HORE TLHAHISO ENA EA BNP E NA LE TABA TSE NGATA TSE IKHANYETSANG.  HOA MAKATSA HORE E RE KAMORA’ HORE BNP E HLOLEHE HAMPE-MPE HO HAPA LIKHETHO E BE E RE E KA AMOHELA SEPHETHO HA FEELA E KA FUOA LITULO KA KHABINETENG, TSEO HA E LE HANTLE E SE  NANG TOKELO HO TSONA HO HANG HO LATELA SEPHETHO SA LIKHETHO.  TLHAHISO ENA EA BNP E TSOELA PELE KA HORE HO AMOHUOE MAKHOTLA A MOLAO MATLA, LE HORE TSEKO EA NAKO E TELELE E PAKENG TSA MONGHALI JOSIAS VAN ZYL (LE LIKHAMPHANI TSA HAE) LE ’MUSO OA LESOTHO LI FETISETSOE  MAKHOTLENG A MACHABA (INDEPENDENT INTERNATIONAL TRIBUNAL).

 HO BUA ’NETE, TLHAHISO ENA EA BNP HA E NA ’NETE, E RERETSOE FEELA HORE ’MUSO O AMOHELE LINTHO TSEO BNP E SENG E LI BEHILE KAPEL’A MAKHOTLA A MOLAO. ’MUSO O LABALABELA HORE LITSEKO TSENA TSA BNP LI SEBETSOE LI BE LI FELE HONA MOO  MAKHOTLENG A MOLAO, E LENG HONA MOO TOKA E LOKELANG HO  AJOA TENG.  KA MABAKA ANA HA HO KAMOO ’MUSO O KA ITŠENYETSANG NAKO KA HO NAHANA KA THATA KA TLHAHISO ENA EA BNP KAPA HONA HO E AMOHELA.

  KARABO E TSOELA PELE HO SUPA KAMOO E SENG E LE SEMELO SA BNP JOALE SA HO SE AMOHELE SEPHETHO SA MOLAO SA LIKHETHO.  E NE E QALE KA 1970 HA E NE E  HAPA ’MUSO KA LIKHOKA ’ME E BUSA JOALO HO FIHLELA KA 1986 HA ’MUSO OA EONA O LIUHOA KE MAJOR-GENERAL LEKHANYA, EENA ENOA EO E SENG E LE MOETAPELE OA BNP KAJENO.  E BOETSE E HANNE SEPHETHO SA LIKHETHO TSA 1993, EA HLAHLELA NYEOE HOLIM’A MABATOOA A 28, EA MPA EA HLOLOA.  LE KA 1998 EA BOELA EA HANA SEPHETHO EA BA EA KENA MERUSUNG E NENG E RERETSOE HO HLOKISA NAHA BOTSITSO LE HO LIHA ’MUSO KA LIKHOKA.  TSE BABANG TSE TSOETSOENG KE MERUSU ENA LEA LI TSEBA HA KE HLOKE HO LI PHETA.

LIKHETHO TSA MORAO-RAO KE TSA MOTŠEANONG NGOAHOLA, TSE THOHOLELITSOENG KE BALEBELLI BA HAE MONA LE BA MACHABA, BATHO KA  BO-MONG LE  KA MEKHATLO E IKEMETSENG, E LE TSE TSAMAISITSOENG KA KHOTSO, TOKA, BOLOKOLOHI LE PONALETSO; ’ME KA MABAKA ANA LI HLALOSITSOE LI EMETSE KAPA LI SUPA KA HO PHETHAHALA LITABA-TABELO TSA BASOTHO.  HOLIM’A TSENA TSOHLE BNP E BOETSE E LOMAHANTSE MENO E HANA HO AMOHELA SEPHETHO (LEHA KA NQ’E ’NGOE E KENE KA PARAMENTENG) ’ME E NKILE METHATI ENA EA HO HLAHLELA LINYEOE KA KHOTLA ESITA LE OONA ONA OA TLHAHISO ENA E MAKATSANG EA ’MUSO OA KOPANELO EO HO EA KA ’NA E RERETSOENG FEELA HO PHOQA LE HO TSOA MOLAO TLAASE.  HANTLE-NTLE E SUPA FEELA BOTHATA BOO BNP E LENG HO BONA HOO E SENG E SA TSEBE HORE NA E KA ITŠOARELLA KA SEFE SEHLAHLA JOALOKA MOTHO EA EANG LE METSI.

  KARABO E QETELLA KA HO HLOKOMELISA MONGHALI MOLLO LE BA KHEMANG LE EENA HORE ’MUSO ONA O KHETHILOE LIKHETHONG TSE NANG LE TOKA LE BOLOKOLOHI BOHLE,  ’ME O NA LE TOKELO EA HO BUSA HO FIHLELA LIKHETHO TSE TLANG. LEHA HO LE JOALO, ’MUSO O BONTŠITSE BOIKEMISETSO BA ’ONA  HO MAMELA LE HONA HO HLAHLOBA LITLHAHISO TSA BOHLOKOA TSE KA TLISETSANG NAHA ENA EA RONA KHOTSO EA ’NETE LE BOTSITSO.  HA E LE LITLHAHISO TSENA TSA BNP TSONA HA LI NA ’NETE, HA LI NA ’MOKO, ’ME ’MUSO O LI LAHLELA MATJOING.  BNP E ELETSOA HO TSOELA PELE KA LINYEOE TSA EONA TSE KAPEL’A MAKHOTLA A MOLAO E LE HORE E TSEBE HO FUMANA QETO EA  ’NETE MOLEMONG OA SECHABA SOHLE SA BASOTHO.

  BO-NTATE  LE  BO-MME,

  MOHLOMONG LE KA BOTSA KA NEPO HORE NA KE TENA KE PEPESA MEKAEFETHE LE LIKHOBA TSENA TSA BNP HONA JOALE  HOBANE’NG.  LE TLA HOPOLA HORE HOBA KE PHATLOLE PINYANE ENA EA BNP SEBOKENG SE SEHOLO SA LCD, MONGHALI LEKHANYA O ILE A EPA SEBOKA SA LONA BAPHATLALATSI HO HANYETSA TABA TSENA. O BILE A ’NGOLLA MOKHOEPHA OA LENGOLO LE BOHALE MOO HAR’A TSE LING A NENG A TŠOSA KA HORE O TLA PHATLALATSA PINYANE ENA EA BONA.  HAESALE KE LEBELLA KA CHESEHO E KHOLO HORE A  FELE A ETSE JOALO. EMPA HA HO NKO HO TSOA LEMINA! KE MOO KE BONENG HO LE MOLEMO HO MO TSOELA KHOMO HA E LE MOO EENA A CHELE NTŠI.

  LIKOPI TSA MANGOLO LE LITOKOMANE TSOHLE TSEO KE BUILENG KA TSONA LIA FUMANEHA; ’ME LE TLA IPALLA LE HO IKAHLOLELA E LE LONA HORE NA EA BUANG ’NETE KE MANG PAKENG TSA KA LE NTATE METSING  LEKHANYA!

  KEA  LEBOHA.

13 MARCH 2003