MOHLOMPHEHI TONA-KHOLO LE ’MÉ ’MATHATO

MOHLOMPHEHI MOTSAMAISI OA LIPUISANO
KA NTLONG EA MAHOSANA

MOHLOMPHEHI MOTSAMAISI OA LIPUISANO KA
NTLONG EA BAKHETHOA

MOHLOMPHEHI MOAHLOLI E MOHOLO

MOHLOMPHEHI MOTLATSI OA TONA-KHOLO

BAHLOMPHEHI MATONA A KHABANE

BAHLOMPHEHI BAAHLOLI BA LEKHOTLA
LE PHAHAMENG

BAHLOMPHEHI BAEMELI BA LINAHA TSE NANG LE SETSOALLE
LE LESOTHO, LE BAEMELI BA MEKHATLO EA LEFATŠE

BAHLOMPHEHI LITHO TSE KHABANE TSA MATLO A
MABELI A PARAMENTE

BAHLANKA BOHLE BA SECHABA

BO-NTATE LE BO-MMÉ


PHUTHEHO EA HOSENG HA LETSATSI LA KAJENO, E TŠOAEA KETSAHALO E KHOLO NALANENG EA PUSO EA SECHABA KA SECHABA LESOTHO. TLHOMAMISO ENA EA PARAMENTE EA BOTŠELELA KE O MONG OA MEKOLOKOTOANE EA BOHLOKOA PALENG EA TSAMAISO EA PUSO HO TLOHA HA LESOTHO LE FUMANA BOIPUSO LILEMONG TSE MASHOME A MARARO A METSO E TŠELETSENG TSE FETILENG.

LITHO TSE KHABANE,

LE TLA HOPOLA HORE KAMOR’A NAKO E TELELE EA TLHOKAHALO EA PUSO EA SECHABA KA SECHABA, LESOTHO LE ILE LA BUSETSA MOHOMA TEMENG KA HO KENYA TŠEBETSONG PUSO EA SECHABA KA SECHABA SELEMONG SA 1993. LEHA HO LE JOALO RE HOPOLA KA MESARELO E MEHOLO HORE KAMOR’A HORE BASOTHO BA KHETHE PUSO EA BOITHATELO BA BONA KA 1993 LE 1998, NAHA EA RONA E ILE EA APARELOA KE LERU LE LETŠO LA MEFERE-FERE E ILENG EA BEHA NAHA TLOKOTSING E TŠABEHANG. E RE KA HA PHARELA HA E-EO BANNENG, ’MUSO OA KA O ILE OA MEMA SECHABA HO BUISANA KA MOKHOA O KA SEBELISOANG OA HO KHETHA O TLA BOPELA LESOTHO PARAMENTE E NANG LE BOEMELI BA MAIKUTLO A FAPAKANENG HO TSOA MEKHENG E FAPAKANENG EA LIPOLOTIKI.

BOHLE RE LIPAKI HORE LIPUISANO TSENA TSA KHOTSO LI ILE TSA RE TSOALLA LEKHOTLA LA NAKOANA LA LIPOLOTIKI (IPA) ’ME BOHLE RE BOETSE RE LIPAKI HORE LEKHOTLA LENA LE ILE LA SEBETSA KA THATA HO RE TLISETSA BOEMELI BA PARAMENTE BA MASIA-SIANE LE KHEKHETHANE. NTLE LE IPA, BOIKITLAETSO BONA BA ’MUSO BO ILE BA TSOALA LEKHOTLA LE IKEMETSENG LA LIKHETHO (IEC) LE LECHA. KE IEC E ENTSENG MOSEBETSI O TSOILENG MATSOHO TOKISETSONG LE
HO TŠOAROENG HOA LIKHETHO TSE BABATSEHANG TSA MOTŠEANONG 25, 2002. KE NTHO E TSEBAHALANG HORE LIKHETHO TSENA LI ILE TSA THOHOLETSOA KE LEFATŠE KA LIQOLA TSE NGATA HORE E BILE TSE
MOFUTHU, TSE BONALETSANG, TSE LOKOLOHILENG ’ME TSEO HO TSONA HO NENG HO RENA KHOTSO. PARAMENTE ENA EO RE E HLOMAMISANG HOSENG HA LETSATSI LENA, KE NAMANE E TSOETSOENG KE MOSEBETSI ONA O KHABANE OA ’MUSO, IPA LE IEC. BOIPHIHLELO BONA BO LOKELOA KE THOHOLETSO E MATLA.

LITHO TSE KHABANE,

LIKHETHO TSA MOTŠEANONG 25, 2002 LI KA HLALOSOA E BILE MOKOLOKOTOANE OA BOHLOKOA PALENG EA LIPOLOTIKI LE PARAMENTE NAHENG EA RONA. LIKHETHO TSENA LI KHONNE HO
ATAMETSA MOO RE NENG RE SHEBILE TENG - PARAMENTENG E BOEMELI BO PHARALETSENG. MOHLALA KE NTLO EA BAKHETHOA EO HO EONA MEKHATLO E LESHOME EA LIPOLOTIKI E EMETSOENG, LENANE LA BAKHETHOA BA BO-MMÈ LE EKETSEHILE HAHOLO HA HO BAPISOA LE PARAMENTE TSA HO FETA. SENA KE SESUPO SA HORE ’MUSO OA LESOTHO O NKILE TSELA E NEPAHETSENG NTLAFATSONG EA BOEMELI BA BO-MMÈ PARAMENTENG. MOHLOMONG RE KA BE RE SA FIHLELA KATLEHO ENA HA E NE E SE KA THUSO LE BOTŠEHETSI BOO RE BO FUMANENG, HO TSOA HO METSOALLE EA LESOTHO. RE LOKELA HO LEBOHA KA HO KHETHOLOHA METSOALLE E LATELANG: SADC, OAU, COMMONWEALTH LE UN. TŠEBETSO EA BONA E FILE LESOTHO, SADC LE AFRIKA EOHLE TLOTLA. E KA BA PHOSO HO SIEA LIKEREKE, MARENA, MEKHA EA LIPOLOTIKI, BOPHATLALATSI, MEKHATLO E IKEMETSENG ESITA LE SECHABA SOHLE SA THARI E NTŠO LITEBOHONG TSA RONA.
.
LITHO TSE KHABANE,

LE HOJA RE LE MOTLOTLO KA PULO ENA EA PARAMENTE EA BOTŠELELA, KE KA MASOABI A MAHOLO, RE HOPOLANG LITHO TSE KHABANE TSA PARAMENTE EA BOHLANO TSE ILENG TSA FALLA LEFATŠENG LE KA KOANO: KA NTLONG EA MAHOSANA RE ILE RA SIUOA KE BA LATELANG:

HONOURABLE ’MAQAJELA LEBONA LEBONA
HONOURABLE BENETT MAKALO KHAKETLA
HONOURABLE BERENG LETSIE BERENG
HONOURABLE SEEISO MOHOLOBELA
HONOURABLE ’MAQHEQHEBA SEKONYELA




KA NTLONG EA BAKHETHOA:

HONOURABLE LIRA MOTETE - SETHO SA LIKHETLANE
HONOURABLE SEISA NQOJANE - SETHO SA MOHALE’S HOEK
HONOURABLE TEBOHO MOHAPELOA - SETHO SA KETANE
HONOURABLE MOTLALENTOA MOHLAKOLA - SETHO SA PULANE
HONOURABLE PHELLO NTSOELE - SETHO SA MANTŠONYANE

KE KOPA MOTSOTSO OA KHUTSO HO LITHO HO HOPOLA LIPELESA TSENA TSE MEJA, MASOLE ANA A OELENG MOLENG OA NTOA.

LITHO TSE KHABANE.

’MUSO, E LE HO NTŠETSA PELE MERERO EA ONA EA NTLAFATSO, TSAMISO LE PUSO, O TLA TEKA KAPELE HO PARAMENTE ENA LITŠOANTŠO TSE ’MALOA TSA MOLAO. HARA TSONA RE KA QOLLA TSE LATELANG:

THUTO E PHAHAMENG
LEKHOTLA LA LIHLAHLOBO
TSAMAISO EA MAKHOTLA
BOSEBELETSI BA SECHABA
BOTLOKOTSEBE LITABENG TSA THOBALANO
TEKATEKANO EA BANYALANI
BONGAKA BA SESOTHO
TAOLO EA SEPHETHE-PHETHE
(SEHLOMATHISO) SA MOLAO OA LIKAMANO TSA MERABE
(SEHLOMATHISO) SA MOLAO OA BOSHOLU BA LIPHOOFOLO
MERAFO LE LIRAFSHOA
TAOLO EA LIJO

KE TEBELLO LE TŠEPO EA KA HORE PARAMENTE ENA, HO LATELA BOEMO BOO E LENG HO BONA, E TLA KHONA HO KAKASA MOJAROHALI ONA OA LITŠOANTŠO TSENA TSA MOLAO. BOEMELI BO TENG PARAMENTENG ENA EA BOTŠELELA, BO TLA ETSA HORE LIPUISANO (DEBATE) E BE TSE MOFUTHU TSE NANG LE MAMELLANO. KE TAKATSO EA KA HORE HO BE JOALO. PARAMENTE E SEBETSA HANTLE HA E NA LE LIKOMITI TSE HLOKAHALANG ‘ME KE BOIKEMISETSO BA ’MUSO HO BONA HORE TSE KA HLOKOANG HO NOLOFATSA HO THEHOA HA LIKOMITI TSE JOALO LI EA ETSOA.

LITHO TSE KHABANE,

BOKHONI LE BOIPHIHLELO KE LITŠIA TSA MANTLHA HO LITHO TSA PARAMENTE. HO TLA ETSOA LITHUPELO HO LITHO HO MATLAFATSA BOKHONI LE BOIPHIHLELO BA TSONA LITABENG TSA PUSO LE TSAMAISO. LITHUPELO TSENA HA E NA HO BA TSA LITHO TSA PARAMENTE FEELA; MATONA A ’MUSO LE BANGOLI BA BAHOLO BA MAKALA A ’MUSO, LE BONA BA TLA KENYELETSOA LITHUPELONG E LE HORE MAOTO ANA A MARARO A PITSA ENA EA PUSO A TIEE OHLE.

MOLAO OA MOTHEO OA NAHA O PHUTHELETSE BASOTHO TOKELO EA HO KENYA LETSOHO LITABENG TSA PUSO LE NTLAFATSO EA NAHA. E LE HO
PHETHAHATSA PALLO ENA EA MOLAO OA MOTHEO, ’MUSO O TLA THEHA PUSO EA LIBAKA METSENG LE LIBAKENG TSA LITOROPO. MELAO E ’MELI, OA PUSO EA LIBAKA, OA 1997, LE OA LIKHETHO TSA PUSO EA LIBAKA OA 1998, E TLA KENNGOA TŠEBETSONG HO TLISA PUSO EA LIBAKA EA SECHABA KA SECHABA.





LITHO TSE KHABANE,

MOKHOA OA HO RALA LITABA TSA TSOELO-PELE LESOTHO MONA O TLAS’A LIPHETOHO TSE KHOLO HA JOALE. KE TABA E TSEBAHALANG ’ME E HLOKOMELEHILENG HORE E KA KHONA SECHABA SE KENYE LETSOHO MERALONG EA MERERO EA TSOELOPELE E LE HO ETSA BONNETE BA HORE MERALO E JOALO E TLA FELA E SE TSOELE MOLEMO. KE KA LEBAKA LENA ’MUSO OA KA O KENYELELITSENG SECHABA, KA MAFAPHA ’OHLE A SONA TŠEBETSONG EA HO BOPA “TORO” KAPA EONA CHEBELO PELE E TLA SE TATAISA TSELENG EA TSOELO-PELE NAKONG EA LILEMO TSE MASHOME A MABELI. KA TSELA E TŠOANANG, MAFAPHA ’OHLE A SECHABA A BOETSE A KENYELLELITSOE TOKISONG EA TOKOMANE E AMANANG LE MERALO EA PHENYO EA BOFUMA, E LENG E ’NGOE EA LITSELA TSEO RE TLANG HO FIHLELA CHEBELO-PELE EA SECHABA (VISION 2020). HO FETA MONA, ’MUSO OAKA O BOETSE O HAR’A TŠEBETSO EA HO NTLAFATSA LE HO LOKISA LITABA TSA BOSEBELETSI BA SECHABA, KA SEPHEEO SA HO NTLAFATSA MOKHOA OA HO ISA LITŠEBELETSO SECHABENG.

BOITLAMO BA ’MUSO OA KA HA BO THEKESELE MALEBANA LE MAANO A TENG A MORUO LE TABA TSA LICHELETE, HAHOLO TŠEBELISANONG- MMOHO LE BA MOKHATLO OA LEFATŠE OA LICHELETE (INTERNATIONAL MONETARY FUND). MORALO OA TŠEBELISANO-MMOHO ENA O AMA LINTLHA TSE LATELANG, KA HO QOLLEHA:

• KHOLO E TSITSITSENG EA MORUO;
• BOIPHIHLELO POKELLONG EA LICHELETE;
• TAOLO E NTLE EA TŠEBELISO EA LICHELETE;
• TAOLO E CHATSI EA MEKOLOTO EA ’MUSO;
• TLHAHISO EA MESEBETSI EA SECHABA.

E LE HO FIHLELA MEKHAHLELO EA LIKATLEHO TSE LEBELETSOENG MORALONG ONA OA TŠEBELISANO-MMOHO LE BA MOKHATLO OA LEFATŠE OA LICHELETE, MORERO OA HO THAKHOLA LEFAPHA LA POKELLO EA LICHELETE O SE O HATETSE PELE HAHOLO. LEFAPHA LENA LE TLA OKAMELA ESITA LE HO TATAISA MAFAPHA A MANG ’OHLE A SEBETSANANG LE POKELLO EA MAKHETHO, KA SEPHEO SA HO NTLAFATSA TŠEBETSO. E LE HO MATLAFATSA TŠEBETSO EA POKELLO EA LICHELETE LE MAKHETHO, ‘MUSO O TLA KENYA MOFFUTA O MOCHA OA LEKHETHO LA THEKISO (VALUE ADDED TAX). LEKALANA LA LICHELETE (TREASURY) LE TLA MATLAFATSOA E LE HO HLEKA TŠEBETSO EO ESALENG E SALLA MORAO ’ME E KENYELLETSANG LITLALEHO TSA LICHELETE TSA SECHABA (PUBLIC ACCOUNTS). HO FIHLELA SEPHEO SENA HO TLA KENNGOA MOKHOA O MOCHA OA TAOLO LE TSAMAISO EA LITABA TSA LICHELETE KA LI-COMPUTER.

TUMELLANO E NCHA EA KOPANO EA LINAHA TSA TIKOLOHO EA AFRICA E KA BOROA MAFAPHENG A TSE KENANG LE TSE TSOANG (SOUTHERN AFRICAN CUSTOMS UNION) E TLA KENA TŠEBETSONG ’ME E TLA KENYA MOKHOA O FETOHILENG OA KAROLELANO EA LICHELETE TSE BOKELLETSOENG KE LINAHA TSEO E LENG LITHO. LITOKISO TSE NCHA TSA TŠEBELISANO-MMOHO LE TSONA E TLA BA TSE TLA TSOELA LITHO MELEMO E LI LOKELANG ’ME E LI KHOTSOFATSANG HO FETA PELE.

LITHO TSE KHABANE,

’MUSO OA KA O TLA TSOELAPELE KA PHETISETSO EA LIKHOEBO TSA ’MUSO SECHABENG, E LENG TŠEBETSO E NENG E QALE KA 1995. LITSIANE TSE TLA HLAHA TŠEBETSONG ENA LI TLA SEBELISOA HO AHA MAFAPHA A MORUO A IKEMETSENG, HO KENYELETSA LE LETSETE LEO HO LONA LIKHOEBO TSE NYENYANE LE TSE MAHARENG LI KA FUOANG MEKITLANE. HO TLA KHOTHALETSOA BASOTHO BA NANG LE BOIPHIHLELO KA LITSEBO LE LICHELETE HO KENYA LETSOHO LIKHOEBONG TSENA TSA ’MUSO TSE TLA FETISETSOA SECHABENG.

’MUSO OA KA O TLA TSOSA LITŠEBELETSO TSA LIBANKA TSA LIPOSO E LE HO KHAHLAMETSA SECHABA SE PHELANG LIBAKENG TSE HOLE KAHAR’A NAHA ’ME TSEO MOKHOA OA HO FIHLA HO TSONA O SENG BONOLO.

LITHO TSE KHABANE,

E LE HO FIHLELA SEPHEO SA HO FENYA BOFUMA LE HO THEHELA SECHABA MESEBETSI, ’MUSO O TLA IKITLAELETSA HO NTLAFATSA MAEMO A HLOKAHALANG BAKENG SA HO AHA LE HO ATLEHISA KHOEBO, MESEBETSI E MEHOLO ESITANA LE EONA MESEBETSI E ITŠETLEHILENG KA LIHLAHISOA TSA TEMO. HO FIHLELA SEPHEO SENA, ’MUSO O TLA AHA LEANO LEO KA LONA O TLANG HO HOHELA MATSETE A HLAHANG KANTLE E LE HO AHA MAFAPHA AO.

MESEBETSI E MEHOLO E TLA TSOELA PELE HO THEHOA HO PHARALLA LE NAHA ’ME SENA SE TLA ETSOA KA HLOKOLOSI HO IPAPISITSOE LE PABALLO EA TIKOLOHO. HO TLA AHOA LIBAKA TSA TŠEBETSO TSE NANG LE PHEPELO EA METSI, MOTLAKASE, MEHALA EA KHOKAHANO ESITA LE LITSELA. TEBELLO KE HO HLAHISA MESEBETSI EA NAKO E TELELE EO HO EONA HO KA HIROANG BONYANE BATHO BA LIKETE LI LESHOME.

LITHO TSE KHABANE,

NTLAFATSO LE HO KENYELLETSOA HA LEFAPHA LA LIKHOEBO LE MESEBETSI E MENYENYANE LE E MAHARENG EA BASOTHO MORUONG OA NAHA ENA EA HABO RONA, KE TŠEBETSO E TLANG HO NTŠETSOA PELE KE KOPORASI EA BASOTHO EA LIKHOEBO TSE NYENYANE E LENG BEDCO. SETSI SE SECHA SA LIKHOEBO SE TLA AHOA SETSING SA NTLO-KHOLO EA BEDCO KOANO MASERU. LITSI TSENA TSE TLANG HO HIRISETSOA BAHOEBI LE BO RAMESEBETSI BA BANYENYANE, LI TLA TLISETSA KOPORASI CHELETE ESITA LE HONA HO FUMANTŠA BAHOEBI LIBAKA TSA TŠEBETSO.

’MUSO O TLA ETSA KA MATLA HO ETSA BONNETE BA HORE LIHLAHISOA TSA LESOTHO LI KENA MEBARAKENG EA MACHABA TLAS’A MERERO E KENYELLETSANG OA ’MUSO OA AMERIKA OA HO KENYA LETSOHO KHOLONG EA MORUO OA LINAHA TSA AFRIKA KA TSELA EA HO LUMELLA HO KENNGOA HA LIHLAHISOA TSE ITSENG NTLE LE TEFISO EA MAKHETHO, O BITSOANG AFRICA GROWTH AND OPPORTUNITY ACT (AGOA); TUMELLANO EA COTONOU LIPAKENG TSA LINAHA TSEO E LENG LITHO TSA MOKHATLO OA EUROPE EO KA EONA LINAHA TSA AFRIKA LI LUMELLETSOENG HO KENYA LIHLAHISOA LIMMARAKENG TSA EUROPE NTLE HO TEFISO EA MAKHETHO; LITUMELLANO LIPAKENG TSA LINAHA TSA MOKHATLO OA NTŠETSO PELE EA AFRIKA E KA BOROA (SADC); ESITANA LE MOKHATLO OA LINAHA TSA TIKOLOHO EA AFRIKA E KA BOROA LEFAPHENG LA TSE KENANG LE TSE TSOANG (SACU). HO FIHLELA SEPHEO SENA, ’MUSO OA KA O TLA HLAHLOBA LEANO LA KHOEBO E LE HO LE NYALANYA LE MERERO EA KHOEBISANO EA LEFATŠE E LE HORE
LESOTHO LE KHONE HO NKA MENYETLA MOLEMONG OA KHOLISO EA MORUO.

KA TŠEBETSO EA LEFAPHA LA SELEKANE SE HLOEKILENG (SMART PARTNERSHIP HUB) ’MUSO OA KA O TLA KHOTHALETSA TŠEBELISANO –MMOHO LE KHOKAHANO LIPAKENG TSA MAFAPHA A AMEHANG LITABENG TSA NTLAFATSO EA MORUO E LENG ’MUSO, MAFAPHA A IKEMETSENG, LEFAPHA LA BOSEBETSI, LEFAPHA LA LIPHATLALATSO, BARUTEHI, MEKHA EA LIPOLOTIKI, MEKHATLO E SA OELENG ’MUSONG LE SECHABA KA KAKARETSO.

LITHO TSE KHABANE,

LEFAPHENG LA BOSEBETSI, ’MUSO O TLA TIISA BOITLAMO BA OONA BA HO NTLAFATSA LITABA TSA KHIRO, HO ELA HLOKO LITABA TSA BOSEBETSI BO HLOAHLOA ESITA LE HO AHA KHOTSO LE KUTLOANO LIBAKENG TSA TŠEBETSO, E LENG LINTLHA TSA BOHLOKOA MOLEMONG OA HO HOHELA BO-RAMATSETE BA HLAHANG KANTLE. TABENG ENA, ’MUSO O TŠOARISANE LE MAFAPHA A MANG A AMEHANG, O TLA BOELA O HLAHLOBISISA MOLAO OA BOSEBETSI E LE HO ETSA BONNETE BA HORE O NTSE O LE BOEMONG BO AMOHELEHANG BA MACHABA; ’ME O TLA THUSA BALEKANE BA OONA TŠEBETSONG HO ELA HLOKO KAROLO TSA BONA E LE HO BA SUSUMELLETSA HO SEBETSA LITABA TSA BOSEBETSI HANTLE MOLEMONG OA PABALLO EA MAPHELO A BASEBETSI LE BOIKETLO BA BONA.

LEFAPHA LE SA TSOA THEHOA LA THIBELO LE PHELISO EA LIKHOHLANO, ’MOHO LE LEKHOTLA LA BOSEBETSI ESITA LE LA MAIPILETSO LA BOSEBETSI, LE TLA MATLAFATSOA E LE HO AKOFISA LITABA TSA THAROLLO EA LIKHOHLANO TSA BOSEBETSI KA SEPHEO SA HO AHA KHOTSO LE KUTLOANO LIBAKENG TSA TŠEBETSO. SENA SE TLA AHA TŠEPO HO BO-RAMATSETE.

’MUSO O BOELA O ITLAMA HO QALA MORERO O TLA SEBELISOA HO LEFA BASEBETSI SEBAKENG SA PHOMOLO EA SETSOETSE LE EA HO KULA EKASITANA LE MATŠELISO A HO LEMALA; A HO PHOMOLA TŠEBETSONG LE A MANG. E LE HO FANA KA TŠIRELETSO BAKENG SA MAHLASIPA A LIKOTSI TSA MEBILENG LE BAPHELISUOA BA ’ONA, ’MUSO OA KA O TLA NTLAFATSA MATŠELISO A FANOANG TLAS’A SEKHURUMETSO SE TLOAELEHILENG SA “THIRD PARTY”

LITHO TSE KHABANE,

’MUSO O NKA LEFAPHA LA TEMO E LE LA BOHLOKOA HAHOLO TOANTŠONG EA BOFUMA; BOTSITSONG BA BOEMO BA LIJO HAHOLO NAKONG ENA EA TLALA; ESITA LE TLHAHISONG EA MESEBETSI. KA THOKO HO MOO, E LE HO SHEBANA LE BOTHATA BA KHOHOLEHO EA MOBU ESITA LE TLHAHISO E TLAASE EA LIJO, ’MUSO OA KA O IKEMISELITSE HO MATLAFATSA MEKHOA EA HO FELISA KHOHOLEHO ENA. HO TLA THEHOA MESEBETSI E AMANANG LE PHELISO EA KHOHOLEHO EA MOBU EO BATHO BA TLA HIROA HO EONA. HO TLA ETSOA MOLAO O TLA FA LEKALA LA TEMO BOIKARABELLO BA HO SIRELETSA MEKHOABO LE MEHLOLI EA METSI KA SEPHEO SA HO THIBELA KHOHOLEHO EA MOBU.

HO TLA ETSOA TŠEBETSO EA HO NOESETSA LIJALO LIBAKENG TSE NANG LE MONYETLA OA TLHAHISO E KHOLO E LE HO NYOLLA TLHAHISO EA MEROHO LE LITHOLOANA KA MOKHOA O PHAHAMENG. ’MUSO O NA LE MERALO EA HO NTLAFATSA LERUO LA LIPHOOFOLO MOLEMONG OA HO EKETSA LIJO ESITA LE HO MATLAFATSA MORUO OA NAHA. E LE HO FIHLELA SEPHEO SENA HO TLA TEKOA MOLAO, PARAMENTENG EONA ENA, BAKENG SA TŠIRELETSO EA MOBU LE TLHOKOMELO EA MAKHULO MOLEMONG OA LIPHOOFOLO.

MOLAO OA MEKHATLO EA LIKOPORASI OA (COOPEERATIVE SOCIETIES ACT, 2000) O BEBOFALITSE HO THEHOA HA MOKHATLO O MOHOLO, O SA TSOA NGOLISOA KA MOLAO. MOKHATLO ONA O TLA SEBELISA MEKHATLOANA E KA TLAS’A OONA HO BONA HORE HA HO MOBU O SA SEBELISOENG, HAHOLO HA O LE MAEMONG A MATLE.



LITHO TSE KHABANE,

MOTHATING OA HO QALA OA PARAMENTE ENA, MOKHAHLELO OA 1B OA MORERO OA METSI A LIHLABA TSA LESOTHO(PHASE 1B) O TLA PHETHELOA; ‘ME LITHERISANO LI TLA TSOELA PELE KA SEKHAHLA SEBAKENG SA MEKHAHLELO E MENG E LATELANG.

’MUSO O IKEMISELITSE HO IKITLAELLETSA NTŠETSO-PELE LE NTLAFATSO EA LIHLOLILOENG TSA NAHA ENA, MOLEMONG OA SECHABA. KA LEBAKA LENA, ’MUSO O TLA ETSA BOITHUTO KA KHONAHALO EA HO AHA MORERO OA PHEPELO EA METSI LIBAKENG TSE KA MABALANE KA HO SEBELISA METSI A HLAHANG LITHABENG LE MESIKONG EA TSONA KAHAR’A NAHA EA LESOTHO. SEPHEO SA MORERO ONA E TLA BE E LE HO MATLAFATSA BOKHONI BA NAHA EA RONA HO LATELA TABA-TABELO EA PHEPELO EA METSI MOLEMONG OA MALAPA, TEMO LE MESEBETSI E MEHOLO. E LE KAROLO EA MORERO ONA, HO TLA AKOFISOA BOITHUTO KA KHONAHALO EA HO AHA LETAMO LA METOLONG E LE HO FEPELA MOTSE-MOHOLO OA MASERU ESITANA LE METSE LE LITOROTSOANA TSE O POTA-POTILENG. SEPHEO SA RONA KE HO FIHLISA PHEPELO ENA EA METSI BONYANE KAROLONG EA MASHOME A SUPILENG LEKHOLONG SECHABENG SE PHELANG METSENG E HOLE LE LITOROPO, NAKONG EA TULO EA PARAMENTE ENA.

KOPORASI EA MOTLAKASE E TLA FETISETSOA SECHABENG E LE HO NTLAFATSA PHANO EA LITŠEBELETSO LE POKELLO EA CHELETE. KA TSELA ENA LICHELETE TSA HO E TSAMAISA LI TLA THEOHA. TAOLO EA THEKO EA MOTLAKASE ’MOHO LE PHANO EA LILAKESENSE, E TLA ETSOA KE OFISI E NCHA E TLA THEHOA. ’MUSO O TLA NTLAFATSA PHEPELO EA MOTLAKASE METSENG E LE TLATSETSO TOANTŠONG EA BOFUMA.

’MUSO O TLA SEBELISA KOMISI E SA TSOA THEHOA EA TŠEBELISANO- MMOHO PAKENG TSA LESOTHO LE AFRIKA BOROA HO QALA MORERO OA HO ETSA ’MAPA (GEOCHEMICAL MAP) O BONTŠANG BOTENG BA LIRAFSHOA HO PHARALLA LE NAHA EA LESOTHO, EKASITANA LE TŠEBETSO EA HO RAFA LE HO BETLA LEJOE LE HO LE REKISA LIMMARAKENG TSE KANTLE HO NAHA. HO FETA MONA, HO TLA FETISOA MOLAO OA LIRAFSHOA O TLA LUMELLA HORE HO THEHOE MESEBETSI E MENYENYANE EA MERAFO MOLEMONG OA BASOTHO

LITHO TSE KHABANE

KE BOIKEMISETSO BA ’MUSO OA KA HO KENYA TŠEBETSONG LE HO ANETSA HOHLE KA HAR’A NAHA, MEKHOA EA SEJOALE-JOALE EA LIKHOKAHANYO KA MEHALA, ESITA LE HO BONA HORE TŠEBELISO EA LI-COMPUTER E-EA NTLAFATSOA E BILE E ANELA BOSEBELETSING BOHLE BA SECHABA. MOLAO OA LIKHOKAHANYO(TELECOMMUNICATIONS ACT) 2002) O BATALALITSE MABALA HO NOLOFALETSA BORAMATSETE HO KENYA CHELETE EA BONA MERERONG EA HO ATOLOSA TŠEBETSO EA LI-FONO-FONO KOANO LESOTHO LE HONA HO QOTHISANA LEHLOKOA TŠEBETSONG EO. SENA SE TLISITSE NTLAFATSO E KHOLO LITŠEBELETSONG TSA LIFONO-FONO LIBAKENG TSE NGATA KA HAR’A NAHA, HO KENYELETSA LE LIBAKENG TSE KA MALOTING.

’MUSO OA KA O TLA AHA LITORA TSA SEJOALE-JOALE NAHA KA BOPHARA MOLEMONG OA KHASO E BATSI EA LI-EA-LE-MOEA LE TELEVISION. HO FETA MONA, ’MUSO OA KA O TLA TSOELAPELE HO KHOTHALETSA LI-EA-LE-MOEA TSE IKEMETSENG HO BA LE SEABO MOSEBETSING OA KHASO. MELOAOANA E TLA ETSOA TLASA MOLAO OA LIKHOKAHANYO (TELECOMMUNICATIONS ACT 2000) MOLEMONG OA HORE LI-EA-LE-MOEA LI HASE KA TSELA E MAKHETHE E BONTŠANG BOIKARABELO LE BOITLHOMPHO.

LITHO TSE KHABANE,

’MUSO OA KA O FUMANE HO LE BOHLOKOA HO HOKELLA LITABA TSA BOHAHLAOLI, BOSECHABA LE PABALLO EA LIHLOLILOENG TLAS’A LEKALA LE LE LENG. LEKALA LENA LE LECHA LA BOHAHLAOLI, BOSECHABA LE PABALLO EA TIKOLOHO, LE TLA BA LE BOIKARABELLO MESEBETSING E LATELANG EA MANTLHA:

• HO NTLAFATSA MAPHELO A SECHABA SE LITOROPONG LE METSENG, LE HONA HO FELISA BOFUMA.
• TAOLO, PABALLO LE TŠIRELETSO EA BOIEANE BA LIHLOLILOENG E LE HO FELISA BOFUMA LE HO NTLAFATSA BOPHELO BA SECHABA KA KAKARETSO.
• PABALLO EA MEHLOLI EA METSI
• NTLAFATSO LE KHOLISO EA BOHAHLAOLI.

HO FIHLELA MERERO ENA, ’MUSO OA KA O TLA PHETHAHATSA MOLAO OA BOHAHLAOLI (TOURISM ACT 2002) ’ME HAR’A MERERO EA BOHLOKOA, HO TLA THEHOA KOPORASI EA BOHAHLAOLI. MERERO OA THELELISANE EA LEHLOENG EA MAHLASELA, O TLA AHOA KA MEKHAHLELO. MORERO ONA O TLA TLISA MESEBETSI, O KENYE CHELETE KA HAR’A NAHA LE HO KENYETSA ’MUSO LEKHETHO. TŠEBELISANONG LE ’MUSO OA AFRIKA BOROA, ’MUSO OA KA O TLA TSOELAPELE HO PHETHAHATSA MORERO OA BOHAHLAOLI OA PABALLO EA LIHLOLILOENG TSA LITHABA TSA MALOTI (MALOTI DRAKENSBURG TRANS-FRONTIER CONSERVATION AND DEVELOPMENT PROJECT).




LITHO TSE KHABANE,

’MUSO OA KA O THEHILE LEKALA LE LECHA LA TEKA-TEKANO, BACHA LE LIPAPALI. HARA TSE LING, LEKALA LENA LE FUOE BOIKARABELLO BA HO SEBELETSA TEKA-TEKANO, HO HLOMELLA BASALI E LE BONA BA LI HULANG PELE TOANTŠONG EA BOFUMA, TOANTŠONG EA MAFU, LE KHOLISONG EA MORUO. SELEMONG SONA SENA, LEANO LA NAHA HOLIM’A LITABA TSA TEKA-TEKANO LE TLA THETHOA ’ME LE PHETHAHATSOE. E LE TŠALO-MORAO EA LITABA TSA BOHLOKOA TSE BUILOENG KOPANONG E KHETHEHILENG EA LEKHOTLA LA MACHABA A KOPANENG HOLIM’A LITABA TSA BANA, E NENG E LE NEW YORK KA MOTŠEANONG 2002, ’MUSO O TIISA MONA BOIKEMISETSO BA ’ONA BO SA THEKESELENG BA HO SIRELETSA BANA LE BACHA KHAHLANONG LE MEFUTA EOHLE EA TLHEKEFETSO EA BONA LE HO LAHLOA KHEREHLOA. KA LEBAKA LENA, MOHOMA O TLA BOELA TEMENG HO PHETHAHATSA MELAO EA NAHA EA TŠIRELETSO EA BANA LE BACHA.

LITABENG TSA LIPAPALI, ’MUSO OA KA O TLA ETSA MERALO EA THUTO EA TSA LIPAPALI LIKOLONG TSA KOETLISO EA MATICHERE LE SEKOLONG SE SEHOLO SA SECHABA. ’MUSO O RERILE HO AHA MABALA A LIPAPALI KA BOPHARA BA NAHA. HAR’A LITSI TSE TLA AHOA HO KA BOLELOA SE TLA AHOA LIKALANENG HA MOHALE.

LITHO TSE KHABANE,

E LE TŠALO-MORAO EA LITABA TSA SEBOKA SA JOMTIEM SA SELEMO SA 1990, HA ESALE LEANO LA MANTLHA LA ’MUSO OA KA LITABFENG TSA THUTO E LE HO ANETSA THUTO EA MATHOMO HO BANA BOHLE BA BASOTHO. KA EBAKA LENA ’MUSO OA KA O TLA AKOFISA HORE THUTO EA MATHOMO E SA LEFELLOENG E ANELE METHATI EOHLE EA THUTO EA MATHOMO. MOLEMONG OA HORE BANA BOHLE BA FUMANE THUTO, ’MUSO OA KA OTLA TSOELA PELE HO AHA LIKOLO TSA ’MUSO LE HO THUSA LIKEREKE KA MEAHO LE THEPA EA LIKOLO, LE HO LEFA MEPUTSO EA MATICHERE.

JOALOKAHA LESOTHO LE TEKENETSE TUMELLANO EA LINAHA TSA SADC HOLIMA LITABA TSA THUTO LE KOETLISO, ’MUSO OA KA O IKEMISELITSE HORE LESOTHO MONA THUTO EA MANTLHA E TSEHETSOE KA LIKHAFA TSA SECHABA, E KENYELETSE LILEMO TSE THARO TSA PELE TSA THUTO EA LIKOLO TSE MAHARENG. E LE HO BEBOFALETSA BATSOALI BOIMA BA TEFO EA LICHELETE TSA SEKOLO, ’MUSO OA KA O TLA KENYA TŠEBETSONG MORERO OA PHEPELO EA LIBUKA LIKOLONG TSE PHAHAMENG. LEANO LA LIHLAPISO LE QALILENG KA PHEREKHONG, 2000, LE TLA NTSETSOA PELE MOLEMONG OA BANA BA BA HLOKANG HORE BA TSEBE HO KENA LIKOLO, TSE PHAHAMENG.

HO LOANTŠA BOFUMA, ’MUSO OA KA O TLA EKETSA LIKOLO,KOETLISO HO TSA MAHLALE LE MESEBETSI EA MATSOHO. MOLAO O LAOLANG THUTO EA MOFUTA ONA OA (TECHNICAL AND VOCATIONAL EDUCATION AND TRAINING 1986) O TLA NTLAFATSOA HO EKETSA BOEMELI BA BO-RAKHOEBO LE MESEBETSI E MEHOLO BOTONG EA BOTSAMAISI.

’MUSO O TLA LULA O HLAHLOBA NAKO LE NAKO MANANE-THUTO HO IKHOTSOFATSA HORE THUTO EA RONA E FELA E ARABELA LITLHOKO TSA MORUO OA NAHA. KOETLISO EA MATICHERE E TLA MATLAFATSOA LE HO HOLISOA. KA TSELA E TŠOANANG, ’MUSO O TLA MATLAFATSA THUTO E KA NTLE HO SEKOLO (NON-FORMAL EDUCATION).

HO TLA FETISOA MOLAO OA THUTO E PHAHAMENG LE OA TSAMAISO EA LIHLAHLOBO. KA HOLIMO HO MOO, ’MUSO O TLA BOPA LE HO PHETHAHATSA MORALO O TLA NETEFATSA HORE MANGOLO A FANOANG KE LITSI TSA THUTO LE THUPELO, A FELA A LE BOEMONG BO LEKANANG.




LITHO TSE KHABANE,

’MUSO O IKHOLISITSE HORE KE FEELA KA HO KOETLISA BASEBELETSI LE HO BA ABELA MESEBETSI HO LATELA LITSEBO TSA BONA, O KA TSEBANG HO FANA KA LITŠEBELETSO TSE NTLE SECHABENG. KA LEBAKA LENA ’MUSO O TLA KHOTHALETSA HORE HO BE LE LIPHETOHO MOLAONG OA MOTHEO E LE HO TLISA PHETOHO TSAMAISONG EA TAOLO EA BOSEBELETSI BA SECHABA.

TULONG EA PELE EA PARAMENTE ENA, MOLAO OA BOSEBELETSI BA SECHABA OA 1995 O TLA HLAKOLOA ’ME SEBAKA SA ONA SE NKOE KE MOLAO O MOCHA O TLA ETSA HORE BOSEBELETSI BA SECHABA E BE BO MOLEMONG OA SECHABA. MELAOANA E KOLLANG MOLAONG OO O MOCHA LE EONA E TLA BOPTJOA.

HO LATELA BOIKARABELO BA ’MUSO HO BAHLANKA BA OONA, ’MUSO O ELELETSOE HORE LIPENCHENE TSA BAHLANKA BA ’MUSO LIA FOKOLA. HO ARABELA BOTHATA BONA, MOLAO O TLA TEKOA KAPELE HO PARAMENTE OO KA OONA BAHLANKIA BA ’MUSO BA TLA NTŠA SEABO LETSETENG LA PENCHENE LEO ’MUSO O BA LOKISETSANG LONA.

LITABENG TSA BOPHELO, ’MUSO O TLA SEBELETSA PABALLO EA BOPHELO LE BOIKETLO BA SECHABA. HO PHETHAHATSA SENA ’MUSO O THEILE LEANO LE LECHA LA TŠEBETSO. LEANO LENA LE KENYELETSA TŠEBETSO E HOKAHANENG HANTLE SEBAKENG SA LIPETLELE TSA LIKEREKE LE SEPETLETE SE SEHOLO SE SHEBANENG HAHOLO LE KALAFO E KE KENG EA ETSOA KE LIPETLELE TSE LITEREKENG. HO PHETHAHATSA LEANO LENA SEPETLELE SE SEHOLO SEO E TLA BA ’MALIPETLELE TSA LESOTHO SE TLA AHOA.

’MUSO KA LEKALANA LA BOIKETLO BA SECHABA, O TLA TSOELAPELE HO THUSA BAFUMANEHI KA MEKHAHLELO EA BONA. ELE O MONG OA MEKHOA EA BOHLOKOA-HLOKOA OA HO LOANTŠA BOFUMA, ’MUSO O TLA PHETHAHATSA MORERO OA PENCHENE EA MAQHEKU LE BATHO BA NANG LE BOKOOA. MOLAO O HLEKELANG PHETHAHATSO EA MORERO ONA O TLA TEKOA KA PELE HO PARAMENTE ENA. E LE HO MATLAFATSA TŠEBELISANO ’MOHO PAKENG TSA ’MUSO LE LIKEREKE LITABENG TSA BOPHELO, ’MUSO O TLA TSOELAPELE HO THUSA MOKHATLO OA LIPETLELE TSA LIKEREKE (CHAL).

LITHO TSE KHABANE,

LESOTHO JOALOKA LINAHA TSE NGATA TSA LEFATŠE, LE TJAMETSOE KE SEOA SA HIV/AIDS. LEFU LENA BO-NTATE LE BO-MMÈ LE IPHETOTSE KHOLUMO-LUMO, E JA SECHABA SA BASOTHO, E JA LE MORUO OA NAHA. HO LOANTŠA KHOLUMO-LUMO ENA, ’MUSO OA KA O SE O ENTSE LEANO LE MORALO OA HO LE KENYA TŠEBETSONG. ’MUSO O BUTSE LE OFISI E KHOLO E BITSOANG LAPCA E TLANG HO HOKAHANYA TŠEBETSO EOHLE EA TOANTŠO EA SEOA SENA LE MAKALA A ’MUSO, MEKHATLO E IKEMETSENG, LIKEREKE ESITA LE BATHO KA BOMONG.

’MUSO O IKEMISELITSE HO LAOLA KA MATLA TŠEBETSO LE TAOLO EA MOBU. HO FIHLELA SENA, TOKOMANE E SE E LOKISITSOE HO IPAPISITSOE LE LIKHOTHALETSO TSA TLALEHO EA KOMISI EA RAMOLIBELI ’ME TOKOMANE EO E TLA BUUA MAFAPHENG OHLE A SECHABA HO NONYA MAIKUTLO.

KE BOIKARABELLO BA ’MUSO HO BONA HORE BASOTHO BOHLE BA FUMANA BOLULO. KA LEBAKA LENA, ’MUSO OA KA O TLA POTLAKISA MERALO E SENG E NTSE E SEBETSA, EA HO NTLAFATSA LITŠEBELETSO TSE KANG LITSELA, KHAHO EA MATLO, METSI, MOTLAKASE, LIFONO, HOHLE KA HAR’A NAHA. HO FETA MONA, E LE HO TŠEHETSA NTLAFATSO EA MESEBETSI E MEHOLO LE TEMO, LE HO NOLOFALETSA BATHO HO TSAMAEA, ’MUSO O TLA NTLAFATSA LITSELA, TSE KHOLO LE TSE NYENYANE HOHLE KA HAR’A NAHA. MOLEMONG OA BATHO BA PHELANG METSENG E HOLE LE LITOROPO, ’MUSO O TLA AHA MAROKHOANA A MAOTO O BE O FANE KA LIKETSOANA HO BA THUSA HO TŠELA LINOKA. MABALA A LIFOFANE LE OONA A TLA NTLAFATSOA HO THUSA BATHO BA PHELANG LIBAKENG TSE HOLE MOO LE LIKOLOI LI SA FIHLENG. LE LEBALA LE LEHOLO LA MACHABA LA MOSHOESHOE I LE TLA NTLAFATSOA HORE LE KHONE HO AMOHELA LIFOFANE TSE KHOLO. HONA HO TLA BULELA LIHLAHISOA TSA LESOTHO TSELA HO EA FIHLA LIMMARAKENG TSA MACHABA.

E LE HO MATLAFATSA POKELETSO EA LICHELETE TSA ’MUSO LE HO LOANTŠA BOSHOLU, ’MUSO O TLA AKOFISA TŠEBELISO EA MECHINE EA LI-COMPUTER HO NGOLISA MAKOLOI.

LITHO TSE KHABANE,

KA SEPHEO SA HO NTLAFATSA LITŠEBELETSO TSA SECHABA, ’MUSO OA KA O TLA AHA MEAHO E LATELANG:

- SEPETLELE SE SEHOLO SA SECHABA;
- NTLO E NCHA EA PARAMENTE;
- LIOFISI TSA ’MUSO MOTSE MOHOLO LE LITEREKENG;
- SETSI SE SEHOLO SA LIPAPALI LE BOIKOETLISO LIKALANENG HA MOHALE.

KAHOLIMO HO TSOHLE, ’MUSO O TLA AHA MEAHO E MEHOLO EA KHOEBO SEBAKENG SE ILENG SA CHESOA LE HO SENNGOA LIKETSAHALONG TSE SOTO TSA 1998.

LITHO TSE KHABANE,

’MUSO LE SECHABA KA KAKARETSO SE TŠOENYEHILE KE LERU LE LETŠO LE APARETSENG NAHA EA LESOTHO, LERU LA BOSHOLU BA LIPHOOFOLO BO MPEFATSANG BOEMO BA BOFUMA BO SENG BO JELE SETSI HAR’A BASOTHO. KA LEBAKA LENA ’MUSO O TLA KENYA TŠEBETSONG KA MATLA LE KA LITSELA TSOHLE, MOLAO OA TOANTŠO EA BOSHOLU BA LIPHOOFOLO (STOCK THEFT ACT, 2001).

’MUSO OA KA O TLA MATLAFATSA LE HO AHA BOCHA SEPOLESA HO LATELA MOLAO OA SEPOLESA (POLICE ACT, 1998). HO FETA MONA, LEKHOTLA LA LITLETLEBO KA SEPOLESA LE LEKALANA LA BOHLAHLOBI LA SEPOLESA LI TLA KENNGOA TŠEBETSONG KA SEPHEO SA HO NTLAFATSA BOSEBELETSI, HO KENYA LE BOIKARABELO HO SEPOLESA SA LESOTHO.

HAELE MABOTHONG A TŠIRELETSO, ’MUSO O TLA TSOELA -PELE KA LITHUPELO LE KAHO-BOCHA TSE NTSENG LI TSOELA PELE E LE HORE MABOTHO A LESOTHO E TLE E BE LITŠIEA TSE MATLA TSA TŠIRELETSO EA MOLAO OA MOTHEO, KHOTSO LE BOTSITSO BA NAHA. LE ’ONA MAUTLOELA A TLA KOETLISOA HORE E BE MEHLALA TŠEBETSONG EA ’ONA E NTLE.

LITHO TSE KHABANE,

’MUSO OA KA O KHATHATSEHILE HAHOLO KE LESISITHEHO LE BONAHALANG LE LE TENG KABONG EA TOKA KA MAKHOTLA HOHLE KA HAR’A NAHA. LEA TSEBA LE LONA LITHO TSE KHABANE MANYESEMANE A RE “JUSTICE DELAYED IS JUSTICE DENIED”. HO LOANTŠA BOTHATA BONA - ’MUSO O TLA FANA KA TSOHLE TSE HLOKAHALANG LE LITHUPELO HO MATLAFATSA BOSEBELETSI BA MAKHOTLA A MOLAO.

’MUSO O TLA AHA TERONKO E NCHA EA SEJOALE-JOALE E LE HO FOKOTSA TŠUBUHLELLANO E KA TERONKONG E KHOLO – MASERU, LE HO NTLAFATSA MAEMO A HLOBAETSANG A KA TERONKONG ENA.

KA HOLIMO HO TSOHLE, ’MUSO OA KA O TLA LOANTŠA KA MATLA BOBOLU KA MEKHOA EOHLE EO BO KA IPONAHATSANG. LESOTHO E TLA BA MOHLALA OA TOANTŠO EA BOBOLU LINAHENG TSA LEFATŠE.

NTHO E ’NGOE E KHATHATSANG ’MUSO LE SECHABA KA KAKARETSO, KE TIEHESO E KHOLO E ETSAHALANG LEFAPHENG LE FANANG KA LIBUKANA TSA HO ETA (PASSPORTS). HO FELISA BOTHATA BONA, ’MUSO OA KA O TLA KENYA TŠEBETSONG MOCHINI O MOHOLO O TLA POTLAKISA TŠEBETSO. TŠEBETSO EA PHANO EA TUMELLO EA NAKO E KHUTŠOANYANE HO BAETI EA, HO CHAKELA LESOTHO, LE EONA E TLA ETSUOA KA MECHINI EA “COMPUTER”; HORE E PHETHOE HANTLE LE KA NAKO. HO TLA BE HO KENNGOE TŠEBETSONG LE MOKHOA O MOCHA OA BOITSEBISO (NATIONAL ID SYSTEM).

LITHO TSE KHABANE,

’MUSO OA KA O TLA TSOELA-PELE HO NTLAFATSA LIKAMANO LE LINAHA TSE LING TSA LEFATŠE LE MEKHATLO EA MACHABA ’ME O TLA TSOELAPELE HO BA SETHO MEKHATLONG E KANG SADC, AU, MOKHATLO OA MACHABA A KOPANENG, MOKHATLO OA LINAHA TSA SELEKANE LE E MENG.

’MUSO O TLA TSOELAPELE KA LIKAMANO LE NAHA EA BOAHELANI EA AFRIKA BOROA TSE TIISITSOENG LE HO NTLAFATSOA KE KETELO EA MOHLOMPHEHI MBEKI, HLOOHO EA NAHA EO, LE TEKENELO EA MORERO OA TŠEBELISANO PAKENG TSA NAHA EA AFRIKA BOROA LE LESOTHO, E ILENG E THAKHOLOA KE EENA MOHLOMPHEHI MBEKI KETELONG EA HAE LESOTHO. SEPHEO SA MORERO ONA KE HO NTŠA LESOTHO BOFUMENG NAKONG EA LILEMO TSE HLANO.

MOHLOMPHEHI MOTSAMAISI OF LIPUISANO KA NTLONG EA MAHOSANA,
MOHLOMPHEHI MOTSAMAISI OF LIPUISANO KA NTLONG EA BAKHETHOA,
LITHO TSE KHABANE,

KE QETELA KA HO LE LAKALETSA LIPUISANO TSA ’NETE TSE MOFUTHU, TSE AHANG, TSE RERETSOENG HO NTŠETSA NAHA ENA EA RONA LE SECHABA SA BASOTHO PELE LE HO SE NTŠA BOFUMENG. HAHOLO E BE LIPUISANO TSE BONTŠANG HORE RE HOLILE LIPOLOTIKING, LE NTSE LE HOPOLA HORE MACHABA A RE SHEBILE KA TEBELLO E KHOLO, HO BONA HORE NA PARAMENTE ENA E NCHA EO RE KENENG HO EONA E EA SEBETSA KAPA CHE. KE NA LE TŠEPO E TIILENG HORE LE TLA FIHLELA KATLEHO E KHOLO.

KA MANTSOE ANA KE MOTLOTLO HO PHATLALATSA TULO EA PELE EA PARAMENTE EA BOTŠELELA EA LESOTHO E BUTSOE.


KHOTSO! PULA! NALA